MIHRING THILTIHTHEIHNA

MIHRING THILTIHTHEIHNA

Pathian thiltihtheihna hi chuan sawi a hlawh a, kan ring emaw ring lo emaw, kan nunin a tawn leh tawn loh chu thuhran ni se, Pathian thiltihtheih zia hi chu kan hre chiang thawkhat a ni. Mihring pawh hian thil a ti thei tawh khawp mai a, Pathian tihlawm ai chuan mihring tihlawm hian lukhawng a nei tawh zawk hial ang.

Mihring hian min tihausa thei a, min chawisang thei a, min tidamin min chhanchim thei tawh khawp mai(a nghawng zel erawh chu eng pawh ni se). Kan duh hunah tak, kan duh dan tak leh kan mamawh ang zela mihring a chet tawh hi chuan kawng hi a kaw ve duak duak mai nia.

Mihring thiltihtheihna chu hnar phal loh hnar ngam loh hian a lo thleng a, mihring tuihalna mihring thiltihtheihna chu a thlahlel fo bawk. “A dik a piang te, a zahawm apiang te, a fel apiang te, a thianghlim a piang te, a thangmawi a piang te” (Philipi 4;8) tih lam kha chu kan ngaihtuah thleng tawh lo a. Rem leh rem lovin Pathian malsawmna nen kan sawizawm a; ‘Kan dil loh zawk malsawmna, kan dil baka Lalpa thilthlawn pek’ titein kan sawi mawi chawp ta zel mai. Rem leh rem loin mihring thiltihah Pathian kan sawi lut ve ta mai thin.

Genesis Bung 14-naa Abrahama( Abrama a nih lai) dinhmunah hian ding ta ila, vawiina ringtute hian engtin tak ti ang maw.

A unaupa Lota chenna Sodom chu an chhehvela Lal Pali tangrualin an bei chiam a, an ei tur leh an ro thil zawng zawng zawng te chhuhsakin, Lota pawh an hruai tel ve a. Chu mi chhanchhuak tur chuan Abrama leh a mite an chhuak a, hlawhtling takin an rawn haw. An thil hlu te an lak let bakah, an mi hruai te pawh an hruai kir leh vek a.

Chutianga an rawn haw hnu chuan Sodom Lal chuan fing takin Abarama chu ruahmanna a siampui a, “ Mihring te hi mi pe la, sumte hi chu nangman nei rawh” a han ti a. Abraman a lo duh awzawng lo. “ Lazai khat te pawh, pheikhawk chilhna pakhat te pawh, i neih reng reng chu ka la lo ang, tiin Lalpa Pathian hmaah ka kut ka phar tawh a ni; chuiti lo chuan, ‘Abrama chu keima tihhausak alawm’  I ti dah ang e” tiin a lo chhang hmiah mai. Sodom Lal tan khan a beidawn thlak hle ang.

Abrama khan engvangin nge a lak mai loh eng vangin nge a hnar a, mi thil pek lo dawn chu eng nge a dik lohna? 

John Gill Bible commentary chuan heti hian a sawi a, “ Abrama kha ral do tura a chhuah hma khan a tawngtai ngei ang a, chutah hnehna a dil ang. Pathianin hnehna a pek phawt chuan thil dang reng reng a lak loh tur thu a lo tiam a ni thei” hei hi a pawmawm viau, ‘Pathian hmaah ka kut ka lo phar tawh si a’ a ti a nih kha.  Pathian hnena a dil kha Pathianin a pe a, chu chu a duh tawk hle a ni. A dil loh zawk malsawmna  leh a mamawh bak kha lak a tum miah lo a. 

Genesis bung 12-ah Pathianin Abrama a kohna kan hmu a, mal a sawm tur thu a tiam bawk, Chumi hnu rei loteah Hausak theihna hun tha a nei a, Pathian thutiam chu a takin a lo thleng ta a ni mai lo em ni? Engvangin nge Kha hun tha kha lo hnar.

Sodom Lal kha Lal phakhar tak a ni. A nihna takah chuan khang thil insem tura a tih zawng zawng kha Abrama ta tur reng a ni a, hmelma lak atanga la lettu a nih avangin. Chu chu Abraman a hre ve kar a, Sodom Lal ruahmnna kha a pawm chuan, Pathian hming a la tichhia ang a, a hausakna chu Pathian atanga a dawn ni loin Sodom lal lak atanga a dawn a ni dawn tih a hria a. “Abrama chu keima tihhausak alawm” ila ti dah ang e, tiin Sodom Lal a chhang. Mihring tihhausak nih kha a duh lo a, a mawlsawmna dawna Pathian aia mihring a langsar tur kha a remti lo a ni.

Abrama dinhmunah hian ka indah chhin thin a, a thutlukna hi a ropuiin a va fim tak em. Mihring thiltih kha Pathian thiltihah a rin lut ve mai lo a, nakina Pathian thiltih luahlan tur khawpa mihring thiltih lo lang tur kha a duh lo a ni. Pathian malsawmna a dawn chu sawi mam chawp ngai, sawi dik chawp ngai ni turin a duh lo a. Pathian rin luh chawp ngaihna Malsawmna chu Pathian malsawmna, Pathian atanga lo chhuakah a ngai thei lo a ni.

Kan dil hma pawha kan mamawh zawng zawng hretu a nih avangin kan dil miah loh kan mamawh min pek pawh a awm ang. Mal min sawm theih nan kan mihring pui te leh he khawvel thil ngei pawh hi a rawn hmang tangkai thin ang. Nimahsela, mihring zawkin pathian kan hmang tangkai ta a, inphen nan leh thiam inchantir nan Pathian tan kan hmang ta thin .

Pathian malsawmna kan tih tam tak hian Pathian hming a tihchhiat zel a, Pathian sawi luh chawp a ngaih zel chuan Pathian thiltihtheihna ni lovin Mihring thiltihtheihna dawngtu kan ni zawk mai lo maw?

Pathian chawisan nge kan nih Mihring chawisan, pathian tihhausak nge kan nih Mihring tihhausak? He khawvel, mihringin thil tam tak a tih theih tawh naah hian Pathian thiltihtheihna chauh hi a ni, kan innghahna tur leh kan la rin tlat tur chu.