MIN NGAIDAM RAWH

A message hnuhnung ber ka dawn  zan kha ka mut hmat zan tak a ni a, ka hmuh meuh chuan a tih tur ang chu a lo tifel diam tawh. 

Kha message kha  a rawn thawn hun tak, dar sawm velah khan lo hmu ta pawh ni ila, engtin nge ka lo dawnsawn ang a, engtin nge ka lo chhan ang le? A duh dan leh a mamawh ang takin ka chhan kher pawh ka ring lo. Keini inkawm ve te chu fiamthu leh thu ho mai maia râk ṭhin kan ni a, kan chet chhiat a, harsatna kan tawh ve chang pang pawhin kan innuihsawh hmasa te te ṭhin kha a ni a. Thil pawimawh thu pawimawhah pawh fiamthu nena chawhpawlh loh chu kan thiam ngai lo.

Chuvangin kha tiang message kha a hun takah hmu ta pawh ni ila, a uang leh tho turah ka ngai ang a, a thangkama awh loh tumin, ka lo fiamthu khalh duh mai ka ring. Ka ti tak tak, “Teh ngawt a, eng nge ngaihdam i ngaihna chhan tur awm?”  ka ti hauh lo ang. “Ka ngaidam thei lo che, i rawn kal apiang hian min tihautak ziah, chaw i heh si, tui i heh si” ka tih loh pawhin smiley  zinga nui hmelchhe ber ka thawn lêt ka ring. 

Eng thil nge a hmachhawn mek ka hrechiang lutuk. A rilru a nâ a, a inchhir lutuk tih pawh ka hria. A harsatna hmachhawn mekah chuan a thiam lo zâwk nia ka hriat avangin, kan inbiak chang pawhin ka lo zilh a, ka lo hau fo ṭhin. Naupang chhia kan ni tawh lo a, thil ṭul feah lo hi chuan kan inphone khat hle. Buaina a han hmachhawn takah chuan a khawhar leh inbunruahna mamawh hian min lo be ve ta zeuh zeuh zawk a. Chutiang hunah chuan ka lo hau a, ka lo fuih ṭhin. 

Kha tiang thil a thlen hma kha chuan thil ti ho reng leh intlawh tawn reng kan ni a, ani chu a che sawn zaâwkah a ṭan avangin, a lungleng leh khawhar chuan a ṭhiante ho min rawn be kual ṭhin a, a biak tam loh ber ka ni ang. Min rawn biak ve chang chuan a rilru tino zual tura lo dawnsawn kha ṭhain ka hre lo a, a duh ang a sawi zo nia ka hriat chuan thil dang ka lo sawipui daih ṭhin, “Tikhan tleirawl chhe lo apiang i lawr kual ang a, i duh leh i zin ang a, i duh leh luiah i kal ang a,” ka lo ti vel mai mai ṭhin.

A chunga thil thleng kha midang chunga thleng lo  a ni bik lo a, a thil tuar kha khawvela tuar awm chhun pawh a ni hek lo. A mizia ka’n en a, puitling taka lo hmachhawn a, chhel taka a tuar tlang lohna chhan tur ka hre reng reng lo. “Mipa kan ni alawm le” tiin a harsatna chu a inhnehtir a tum loh zia a sawi fo. Thutlukna mak tak a siam hmaa a whatsapp status-ah te chuan lui kama a thlalak a rawn dah chhuak a, a hma ang tho khan thu ho tak tak a rawn sawi leh a, a hmel pawh a ngai reng.

Kha tiang kha a ni tih kan hre bik lo a, a harsatna kha buan hneh lo turah kan ngai lo. Mahse, kan hrechiang emaw kan tih kan ṭhianpa kha kan hrechiang lo hle a ni. A nunna chelh tura min beisei takin, hriattirna min rawn thawn ṭheuh a, keini lah chuan kan lo hrethiam der si lo. A duh thu ngeia thi angin lang mah se, a duh dan a ni bik lo tih ka hrethiam.

Kan ṭhianpa thih thu inhrilhin kan inbe kual a, a ṭhen te chu a ruang thlah ngei turin kan kal khawm a, thil thleng kan sawi ho lai chuan, “Min ngaidam rawh u aw” tih whatsapp lama kan dawn ṭheuh thu kan sawi ta hlawm a.  Kei chu ka lo muhil tawh a, a ṭhen chuan whatsapp an lo en lo a, a ṭhen chuan hetiang lam hawi hi a nih an ring lo. Thil hmachhawp tam tak kan neih te leh mawhphurhna eng  eng emaw a kalsan avanga a inthiam loh thu  a sawi fo avangin, a hun taka hmu te pawhin a heti lam hi a rawn sawi niin an ngai a. A nunna lak a duh thu a sawina a ni tih kan hre thiam pha lo kha, keini zawk hi ngaihdam ngai chu kan ni.

A thihna hmangin midang nunna chhanna tur khawpa thil pawimawh min zirtir a. Tu pawh, an harsatna min hrilh a, an manganna min hrilh ngam ve tu; min hrilh kher lo pawh, ka hmelhriat te zinga buaina leh harsatna tâwk ka hriat reng reng, hetianga mangṭhana thu emaw, inchhir thu emaw, thih châk thu emaw, ka hriat phak a sawi reng reng chu ka chhâng lêt ang. Fiamthu a ngaih theih tura sawi pawh nise ka tibuai tho tho ang.  A thil tum ti thei lo turin ka tibuai ang a, a nunna hlut zia chu ka thiam tâwkin ka hrilh nawn leh ang a. Nunna pakhat tal ka chhan ve thei mai thei a sin.

Hetiang hian kan ṭhianpa chungah khan ti thei ila, a thil min hrilh kha lo hrethiam i la, a hun takah hmuin lo chhâng let thei ila, hei hi a hrethiam tawh ngei ang, “Pathian min pek kan nunna hlu tak nena inbuktawk thil engmah a awm lo, Nunna dang chauh lo chu”