ISUA MIT AN TUAM!

Lal Isuan Chhandamna puitlin tura a thil tuar  te hi ringtute tan chuan a ngaihnawm a, engmah hi han ngaihnep a, ngaihthah deuh tur bik reng reng a awm lo. An vua a, chil an chhâk a, an vit a, hlîng an khum tir a, sawisen a ni lovang. Heng zawng zawng zingah hian a  sawisatute’n a mit an tuamsak thu hi kan sawi tam loh leh chàwi lar loh ber niin ka hria. Mit tuam te mai mai chuan a hrehawmna leh tuarna a belhchhah lo viau mai thei. Mahse, an diriamna leh hmuhsitna tizualtu ber erawh a ni thei a, a rilru tina ber a tling thei tho bawk.

.

Chanchin ṭha pahnih Marka leh Luka te hian an rawn ziak a. “A ṭhenin chil an chhâk ta pang a, a hmai an tuam a, an hnek a, a hnenah, ‘ Sawi rawh,’ an ti a. Tin, Chhiahhlawhte chuan an chelh pahin an bêng sawk sawk a.(Marka)”. “Tin, a mit an tuam a,‘sawi rawh tunge vua che?’ tiin an zawt ṭhin a(Luka)”. Tin. Mathaia pawh hian a mit an tuam thu tak chu ziak lang lo mah se, “Tin,a hmaiah chil an chhâk a, an hnek a, ṭhenkhat chuan, “ Nang Krista, tu in nge beng che min hrilh rawh,” tiin, Marka leh Luka ziak nena inlaichin takin a ziak ve bawk.

.

Hei hi Sanhedrin hmaa ding a, Lal Isua leh Puithiam Lalber an inchhal hnu lawka thil thleng a ni a, a mit an tuam sak chhan pawh hi a lang fiah nghal ruak mai. Amah ngeiin Pathian fapaa inchhâl a, thiltihtheihna nei a Pathian ding lama ṭhu tur nia a insawi avangin nasa takin an thinrim a, Mosia dan hmanga Pathian sawichhetu tihhlum theih dan an neih ṭan chhan atan an hmang hial a nih kha.

.

The New Jerome Biblical Comentary chuan Zawlnei Isaia’n, miten an  hmuhsita an diriam tur thu a lo sawi lâwk tawh thlen dikna tiin a hrilhfiah a( Isa 53:3). Eng thuah nge an hmuhsita an diriam? Pathian fapa a nihna leh zawlnei a nihna chu awih lo leh tihel nan a mit an tuamsak a. Engmah hmu thei lova an siam hnu chuan an bêng a, chilte an chhâk a. “ Tu in nge beng che? Min hrilh rawh” tiin an ùan khum vel a. “ Pathian fapa, thiltihtheihna ropui tak nei i ni bawk a, i mit tuam chung pawh khan, tu nge beng che a, tu nge chil chhâk che? Tih i hre thei tho ang chu!” tiin an tiel vel a nih chu.

.

American Missionary, Samuel M Zwemer chuan  a lehkhabu ‘The Glory of Cross’ ah chuan tihian a sawi a, “ Amah an rin lohna chu huatna tel miah lova a thlir tlat vangte, an hriatlohna avanga an thiltihte chu lainatnaa khata a thlir reng vang zawk leh an thinlungte mei kan ang maia a hliau avangin a hmel an hmuh theih loh nan a mit an tuam a ni( Kraws Ropuina- R. Vanlal Rothanga, p25)” tiin a sawi bawk a. A hmelah khan a sawisatute a khawngaihna leh lainatna a rawn lang a, a mit meng zahawm takah khan amah hmusit a kutthlaktute chuan mi sual an nihzia an hmu a, Lal Isua mitmeng leh hmel kha an hmu thei lova, an en ngam thlawt lo a ni ber ang.

.

Luka 5:8 ah chuan, “ Tin, Simon Peteran chu chu a hmuh chuan Isua ke bulah a bawkkhup a, ‘ Lalpa, mi kalsan rawh, mi sual ka nih hi,’ a ti a.” tih kan hmu a. Hei hi Lal Isua leh Petera te  inhmuh hmasak bera thil thleng a ni. Zan khuaa len deng a arte lu kawn bal Petera te khan Lal Isua thupek a nih vang chauhin, beisei sang lo tak chungin li thuk lamah len an deng leh a, an sangha man pawh an rût seng lo hial a nih kha. Hemi ṭuma Lal Isua thiltihtheihna leh a nihna hmutu Petera chuan a en ngam lova, a hmaah bawk khupin, “ Mi sual ka ni” a ti thlawt mai a ni. Lal Isua lam hawi a, a thinlung tak taka a nihna hmuthiamtu chuan; a fellohna te, a chak lohna leh a tlin lohna zawng zawng Lal Isua hmelah a hmu ṭhin a, mi sual chhandam ngai a ni tih hriain a tlawm ṭhin a ni.

.

Tunlai hunah hian Lal Isua mit hi kan tuamsakin a lam hawi duh  lovin thuthlukna, ruahmanna leh duhthlanna kan siam fo ang em? Tih min ngaihtuahtir a. Kan hlâwkna tur, kan hming ṭhatna tur leh dinhmun sang zâwk  min thlentir thei thil eng emaw kan hmaa a lo inchhawp hunah, thil dik chiah lova tih ngaiin, kan tih loh tur tlêm tih a lo ngai ang a. Lal Isua lam hawi ngam lovin a mit kan tuamsak ve fo lo’ng maw? A lam kan hawi a, a hmel kan thlir chuan, kan thil tih tur, kan thutlukna leh ruahmannate chu a dik lo tih kan hmuh dawn avangin; hetiang hlâwkna leh mawina kan ban zawk chhung hian Isua mit kan la tuamsak fo thin.