Pindan Thuhruk

PINDAN THUHRUK

“ I va ngùi ve, I lungngai em ni?”, A rawn ti a.

.

Thlamuang leh hlim tak anga awm tuma lem ka chan laiin, ka chhungril hmu thiam a , ka thinlung ngùi leh chàu tak hmu thiam ni awm taka min betu chu ka en a; min hriatthiam hmél takin min lo en a. A hmel a lainatna leh khawngaihna khat chu mak takin ka hmu thei tlat a. “ Hlim lo hmêl ka pu em ni? Ka hmelah lungngaihna I hmu em ni?” tiin, chhuahchhàl titih hian ka chháng a..

Min fiam mai mai lo tih hriat tak hian, “ I hlim hmêl leh thlamuanna mit meng ka hmu e, mahse, mihring hmêla lang hi a thinlung a ni lo tih ka hria a sin”  a ti a. Ka hmela lungàwina phena ka thinlung thlaphäng hmu thiam a, ka pawn lam chêt dana ka thinlung rumri ka up beh thleng a hretu chu ‘ Tunge ni ang?’ ti a ka ngaihtuah laiin..

“ Khawh teh, min zui la, thil ka en tir ang che” a ti a.

 In lian tak pakhatah kan inzui lût a, chu in chu mihring chènna in pawh a ang lo. Pindan tam tak a awm a, kawngkhar hran ṭheuh an nei a; kawngka ṭhenkhat chu rinawm takin a inkalh a, a thente chu a hming chauh a khar te an ni hlawm a. 

Pindan hmasa berah chuan min luh pui a, a chhung chu a nuam êm êm a, a thawven thlak a, a boruak te chu  a záângin a hahdam hle a. A chhunga bungrua leh thil awm te chu min tihlim tur leh a in cheimawi nana dah a ni tih a hriat theih mai a.

Pindan dang te pawh chu kan kal zel a; chawimawina leh hlawhtlina chhianchhiahna tur a tana siam hrim hrim ni awm tak pindan pakhat chhunga kan awm lai chuan, “ He in neitu hian hengte hi mi hmuh leh hriat loh hlauin he tah hian a dah a nih hi,” a ti a. Mi hipnaa khat nèlawm takin a nui sáng a. A ni ve bawk a chu pindan chu lawmna leh hmingṭhatna lam hlir a ni a, a bang pawh darthlalanga siam a ni.

Min hruaitu chuan chu in chu a hriat chian hmel êm êm a, engkim chu hmu tlang vek ang maiin a lang a. Mak ka tih em avàngin, “ Hei hi tu in nge?” tiin ka zawt a. Ani chuan, “ hei hi in a ni hleinem ka fapa, I thinlung a nih hi,” a ti a. 

Ka phu zawk a, ka harh kawk a. Ka thinlung chhunga rawn leng lut chu tunge a nih ka hre thiam nghal a, pindan leh a chhunga awm zawng zawng te nen chuan. Kan thlir tawh leh kan la thlir leh tur te nen. “Pindan dangah te hian min luh tir dàwn lawm ni?” tiin min dìl a.

Ka fan kual pui zel a, kan thil hmuh leh hriatte chu a neitu zâwk ni àwm tak hian a sawi zung zung a. “ Hei hi I graduate ni kha” .. “ hei hi chu. Hna thar I hmuhna kha a nih hi” tiin kei aia hlim leh lâwm zawk ang hian a lang a. Lungngaihna leh tùarna lam hawiah pawh a tuartu  zâwk ang maiin a hmelah a lo lang chhuak ṭhin a. “ I ngaihzawngin a kalsan lai che kha” “ I nu leh pa an inthen lai te kha he ta hi, i mal a, i beidawng êm êm a nih kha!” a ti a, ka sawi fiah ngai lovin ka nun a thil thleng chu a hre chhiang êm êm zel a.

A thil hriat leh sawi te chu ka ṭhian tha leh lainate hnenah pawh ka lo bun ruah tawh te an ni a. Mahse, Ani  chuan a thûk ber thlengin a lo hria a…

Pindan hnuhnung ber chu ka khár a, chhuak tur anga ka inher lai chuan, “ Saw pindan saw min entir dàwn lo em ni?” a ti a. 

“ Eng pindan!” pindan dang awmin ka hre tawh si lova.

Ani chuan, “ Saw saw” a ti a, in chhung hmun thim lai leh kil ber chu a kâwk a, ka hmu ve ta chauh a ni. A kawngkhar chu nasa takin a inkalh, a chhiain a a tenawm lek lek a. chumi ka hmuh rual chuan ka hlauthawng ta tlat a, ka tiril te an khur der der a, pindan chhunga thil awm te chuan min rawn rùm ṭhaih hian ka hria a. Chu tah chuan a lawm, ṭhian ha leh lainate pawhin min hriatpui loh, ka dài sual tam tak ka ka hriat chhuah chang a ka thinlung chhun ṭhintu chu an awm.

Ka hmela thlaphanna leh thawpikna lo lang chhuak chu a hmuhin, khawngaihna leh lainatnaa khatin min en a, “ chahbi hi là la, hawng rawh, a chhunga I thil dah te chu min hmuh tir ta che” a ti a.

Ka ngam lo. Ka huphurh a, he pindan chhunga thil awm te hian ka nun an tihrehawm a, midangte hmaa min timualpho thei leh thihna khawp hiala min sawisak duhtute an ni. Paih bo a, tih riral tum ṭhin mah ila, min kalsan duh lova, ka chhungah hian awmin min rawn tibuai leh fo thin a.

Ka sualna ṭhenkhat te chu an nasat em avàngin mi dang hmuh ve a rem lova, an hriat ruala mualpho leh hrehawmna min thlen thei a ni.

“ Ka tifai thei, ka thian thianghlim thei, tibuai a timangang leh tawh lo tur che in..”

Chu mikhual hnena  ka thuruk leh ka sual thuhruk hailan mai chu,  ka mualphona leh hrehawmna tipunluntur chauh a nih ka la ring fan a, rei tak ka lo phur tawh a, ka hnûkin ka chauh pui zo tawh si a. Mahse, a hmela khawngaihna leh lainatna te, a aw a thiltihtheihna danglam tak te chuan damna min beisei tir a; hlau leh khur chungin a kuta chahbi chu ka ban a.

Chahbi ka lak lai chuan a kut a perek kilhna hnu ka hmu a, a lukhum ṭihbaiawm tak nen..

Kawngkhar chu ka hawng a, a chîk rùt rùt a. A chhunga thil awmte chuan min ei zawh tum ni awm takin min lo ban a, an ka an áng zuau zuau a. Mahse, ka mikhualpa an hmuh chuan an hlau a, bikbona tur zawngin an hmanhlel a.

A chhung hnawk leh ṭawp tak chu pawisa lo takin mi khual pa chu a tei kual a,  chu pindan thim takah chuan amaha êng lo lang chhuakin, a êng hnuaiah chuan pindan chhunga hnawmhnawk te chu an lo thianghlim ta zel a. Thil ṭihbàiawm leh tawphnawk tak tak te chuan hmel thar an lo pu a, min tina a min tihbuai reng an tum tawh lo.

Mak taka tihdanglamin ka awm a, ka taksa peng hrang hranga sèr nungte chu an dam zel a, hlauhna leh ipikna reng reng ka nei lo.

Chu Mikhual chuan, hlim leh phur takin, “ Tunah chuan I hmelah I thinlung a lang ta e” a ti a.